انتصار ال ثاني في معركه ( الوجبه ) هل هو تزوير بالتاريخ ؟

[راعي واجب]

بالرغم من التطور اللي حاصل بالدول الخليجيه الا انه للحين

مانفتحت ملفات ساخنه تتعلق في بعض القضايا الحساسه

مثلا القصه الحقيقيه من توحيد المملكه ودور بريطانيا وامريكا في هذا

الشأن منذ 100 عام .

والقضيه اللي بصدد نقاشها هي معركه الوجبه وانتصار بن ثاني

في هذي المعركه على الدوله العثمانيه ..

انا بصراحه ماني قادر اهضم سالفه انتصار بن ثاني على الدوله العثمانيه

المتراميه الاطراف في ذاك الزمان ..

اتوقع ان هالمعركه اللي درسناها بماده التاريخ بالاعداديه تزوير بالتاريخ

اذا كان الشعب القطري بهالوقت مايتعدى 200 مواطن مع المجنسين

شلون قدر بن ثاني هزيمه دوله كبيره كل الدول تهابها مثل بريطانيا وفرنسا

قدرنا ننتصر عليها وشعبنا بذاك الزمان ما يتعدى 5000 شخص ما تتفقون معي

ان سالفه هالمعركه صاروخ واحنا صدقناه ؟

الموضوع حساس بس احنا بعصر الديمقراطيه والنقاش فيه مو عيب

ياليت اللي مصدق السالفه يبينها من الالف الى الياء لان هذا تاريخنا

ونبي نعرفه

[سمــــــاي]

.
.

موضوع حســـاس جدا ,.
وجب التنويه من بدايه الموضوع ..

.
.

[قطــ المشتاق ـر]

مساكم الله بالخير




أخوي ( راعي واجب ) .. في البداية ياريت تعطينا الإستنادات اللي على أساسها قلت ان موضوع معركة الوجبة ( صاروخ ) .. يعني هل عندك معلومات عن عدد القوات القطرية والعثمانية في معركة الوجبة ؟؟ عندك معلومات عن الخطة العسكرية اللي استخدمتها القوات القطرية وأدت الى انتصارهم في المعركة ؟؟ هذي أمور مهمة واذا كنت حاب تعرف التاريخ القطري بالتفصيل ممكن ترجع للكتب التاريخية اللي تكلمت عن تاريخ الدولة وتتعمق في التاريخ بالشكل الصحيح .. لأن كتب الاعدادية والثانوية راح تعطيك لمحات مبسطة عن تاريخ دولة قطر وماراح تتعمق في كل الأمور .. الباقي علينا احنا اذا كنا فعلاً مهتمين بتاريخ دولتنا !!



على العموم انا راح أوضح لك بعض الأمور عن معركة الوجبة .. راح اتكلم عن بداية المعركة ومب عن الأسباب اللي أدت الى المعركة لأن الحديث عن الأسباب راح يطول واللي يهمنا بالموضوع كيفية تحقيق القوات القطرية لإنتصارها في معركة الوجبة .. في 25 مارس 1893 قام والي البصرة باعتقال الشيخ أحمد آل ثاني شقيق الشيخ جاسم حاكم قطر إنذاك ومعه 12 من أعيان البلد وحاصر المدينة براً وبحراً .. ولما عرف الشيخ جاسم بأمر الاعتقال والحصار أوهم العثمانيين بأنه ترك قطر وسرّح قواته .. ولكن في الحقيقة هو وزعهم على نقاط رئيسية بخطة محكمة واستولى ايضاً على مصادر المياه في تلك المنطقة .. والوالي العثماني أرسل قوة قوامها 150 جندي الى الوجبة وهناك وقعت القوات العثمانية في كمين أعدته لها القوات القطرية .. وانقضوا عليهم القطريين من كل جانب عند منطقة ( المسيمير ) وكبدتهم خسائر كثيرة في الأرواح .. واضطرت القوات العثمانية الى الانسحاب والتحصن في أحد قصور الشيخ في ( الشقب ) وهناك حاصرتها القوات القطرية .. وهاجمتها بقصف القصر واستولت على المدافع العثمانية .. وفي المساء رجعت القوات العثمانية المنهزمة الى الدوحة للتحصن فيها وأطلقت السفينة العثمانية مدافعها لتغطية عملية الانسحاب .. ونقل والي البصرة اللي كان موجود في الدوحة الى ظهر السفينة استعداداً للهرب .. ونتيجة لاستيلاء القوات القطرية على آبار المياه اللي كانت قريبة من الدوحة أرغم والي البصرة على اطلاق سراح الشيخ أحمد والأعيان اللي كانوا رهائن عنده !!



طبعاً هذي هي معركة الوجبة بإختصار شديد لضيق الوقت عندي .. القوات القطرية ماهزمت عدد كبيييييييييير من القوات العثمانية يقدرون بالآلاف أو مئات الالاف .. ولكنها هزمت 150 جندي عثماني فقط واستولت على مدافعهم واسلحتهم وقتلت عدد كبير منهم .. وهالمعركة علامة بارزة في التاريخ القطري رغم ان عدد القوات المشاركة في المعركة بسيط ولكن انتصار القطريين له مدلولات كبيرة سواء كانت سياسية أو عسكرية أو اقتصادية .. وهالانتصار كان دليل على ضعف الدولة العثمانية وكيفية ادارتها للدول اللي تحتلها وتضييقها على شعوب هالدول !!









يعطيكم العافية

[قليتر قيرل]

معركة الوجبة، حيث قاومهم القطريون بشجاعة فانسحبوا إلى قلعة الدوحة، وكانت هزيمة الأتراك حدثاً هاماً قويت بعده مكانة وسمعة الشيخ قاسم بن محمد آل ثاني، حيث شهد عام 1913 انتهاء النفوذ العثماني على قطر وجلاء القوات العثمانية نهائياً عن البلاد عام 1915، حيث تم تقوية الروابط القطرية مع دول الجوار والبريطانيين

هاي لقيته فى موقع وسويت سيرج
ولقيت كلام اكثر بس للأسف الموقع مايصير اسوي منه كوبي
بقولك اللى قريته بختصار

امير البصره كان يبي يدخل قطر او شى جي ومنعه الشيخ قاسم
فقام وطرش له اخوه احمد
ورده الامير وقاله ابي الشيخ قاسم ايني بروحه
ورفض الشيخ قاسم يروح له البصرره
وطرش اخوه احمد مره ثانيه
فقام وأسر اخوه
اللى هو الشيخ احمد
جان يطرش الشيخ قاسم رسايل حق الهواجر والقبايل الثانيه فى السعوديه
عشان تقوم الحرب
وبالفعل قامت الحرب
وتعاونوا الكثير من العوايل
وخبرك كل عايله داخلهاا شكثر
هواجر ال ثاني بن مسلم منانعه كبسه رميح الخ من العوايل

وصارت الحرب ومات اللى مات وعاش اللى عاش
وانتصر الشيخ قاسم

مااشوف اي فايده لو زوروا فى التاريخ
شالمغزى يعني
وحتى لو تزوير القصه
تمت ع هالقصه الف الاشياء مزوره ماتمت ع هاي يعني


وقواك الله ع الموضوع

[قليتر قيرل]

اووه قطر المشتاق لو قايل لي بترد جان ماتعبت عمري ورديت
وقمت اشرح < والشرح عاد
ع العموم
كلامك عدل
وقواك الله ع الرد السنع هع

[بـن مـسلـّم]

هلا اخوي راعي واجب ..

بس حبيت اقولك بالاول المفروض اذا انك متشكك في تاريخ المعركه

انك تجيب كل الادله والاثباتات الي منها استندت على رايك ان هالمعركه ( صاروخ )

وفي شي ثاني بعد .. من الغلط انك تنسب النصر او المعركه لي آل ثاني لان مب هم بس الي ادخلوا في المعركه

لان كل قبايل قطر ادخلت فيها .. وانا جدي شارك بهالحرب بس للأسف ما لحقت عليه عشان اسمع منه مباشره واسأله عن هالتاريخ

بس اذا متشكك في المعركه .. فأقولك انت جيت في المكان الغلط

واذا انك فعلاً تبي تستفيد وتعرف الحقيقه روح حق الشيبان واسألهم

ومهما تكلمنا مب احنا الي نقدر نرد على تشكيك

لان احنا نستند على الكتب و الوثايق الي انت مب معترف فيها .. فمالك الا انك تسأل الشياب

.
.

كفيت ووفيت قطر المشتاق

راعي واجب

إن كان عندك استفسار ع المعركة اسأل وان شاالله الاعضاء بيجاوبونك
ولكن لا ترمي الاتهامات جزافاً .....!!
هذا شي والشي الثاني شنو الفايده من هالموضوع ....!!
القارئ بين السطور ومن مقارنتك الاولى ممكن يفهم انك تقصد بأن اللي حدث من قوى خارجيه
حتى ينتصرون " ال ثاني " مثل ما قلت في عنوانك
واتمنى انك ما تكون تقصد هالشي

ع العموم ان شاالله تكون استفدت من رد قطر المشتاق ولقيت اجابتك ع السؤال ...

[عنابي-17]

ليش صاروخ؟

هاذي معركة الخفجي اللي صار لها 15 سنه تقريبا أنتصر فيها الجيش القطري على الجيش العراقي
في ضل وجود قوات متعددة الجنسيات وتتفوق على قطر بجميع الإمكانيات لكن الله هو اللي يحقق
النصر

على فكره الجيش السعودي أقحم نفسه بالبطولة وشارك الجيش القطريين بالإنتصار مع أنهم أول ماسمعوا طلقات الجيش العراقي ولوا دبرهم وصمد القطريون


وأنا أذكر لك الموضوع حتى تقتنع وإذا لم تقتنع بإمكانك عمل بحث أو إعادة لحقيقة معركة الخفجي
واللي هي تبين لك أن الإنتصار لايأتي بالعدد والعده

[رياني قطري]

بسم الله الرحمن الرحيم

اخوي ابو الصواريخ

اشلون تزوير تاريخ والشواهد موجوده والاسامي ثابته وسيدنا سمو الامير احياها

الوجبه الشقب امسيمير والروضه ..... الخ

اقولك عندنا بالوكره منطقه معروفه الاول بعين ماء حلو ومعروف عند الاوليين وايضا منطقه الرميله جنوب بوفنطاس منطقه معروفه وايضا القلاع القطريه خير شاهد على وجود حكومه قطريه....

واتمنى منك انك اتزور المتحف ولو انت غريب عن قطر ارجوك عطني رقمك بالخاص وراح استقبلك واضيفك واخذك بجوله حربيه قديمه اتشوف بعينك القوة القطريه العملاقه بانتصارها والصغيره بعددها

والله يعز حكومتنا والقائمين عليها وفيها

[بــ عبدالله ــو]

اعتقد قطرالمشتاق كفى ووفى

[λℓι λℓ.sђαђωαηī]

العضو بو مشاركة وحده .. يحسسني ان فيه شي مب بريء

عموما الربع اللي قبلي ماقصروا .. والمعروف ان البينة على من ادعى .. وانت ماجبت لنا دليل ، وغير هذا كل اللي قلته مجرد افتراضات .. لأن الدولة العثمانية قوية وعدد السكان قطر في ذاك الوقت قليل !! اتمنى ماتقول ان هذا هو الدليل

لو تمخمخ معاي شوي .. ترى القطريين ماحاربوا كل العثمانيين .. المعروف ان في كل مستعمره عدد محدود من جيش الدولة المستعمره .. يعني مب كل الجيش العثماني كان في قطر

والقطريين تغلبوا على هالعدد الموجود

يعني افتراضك كان ناقص اخوي

[Qatar Boy]

احنا عندنا مستندات حقيقية من هالمعركه

ورثناها من جد ابوي المرحوم

هو اللي كان مزود الجيش القطري بالسلاح في هذه المعركه

الشيخ - عبدالله بن جاسم المسلماني ( ألف رحمه علية )

وإذا عندك مستندات او اي شي خلينا نشووف اللي عندك

[بوصقر]

طبعا الاخ اللي متشكك بالمعركة حبيت اوضحلك انها صحيحة 100%100 لانها كانت بمشاركة جميع قبايل قطر بدون ذكر اسمائها لانها معروفة ومايحتاج نعدهم.

والعديد من الشعراء في ذاك الوقت كتب الاشعار والشيلات التي تؤكد انتصار ال ثاني مع اهل قطر على الاتراك ومنها على سبيل المثال

هذه الشيلة المعروفة للشاعر سعد بن علي المهندي

يقول فيها:



تــو مــا زان مــرمــاهــا
....................................... وبـان مـن مـخـلف النـيــــــه

هـقــوة الـلـي تــهـقــواهـا
....................................... جـــات بـالـعكـس مـلــويــــه

دارنا الـلـي ســـكــنــاهـا
....................................... بـالــقــسـا والــفــراهـــيـــه

مـهـبـل الـلـي تـمـنــاهـا
....................................... بـا أمـلـح الـسيف محميـــه

بـو فـهـد شـاد مـبنـاهـا
....................................... يــوم حــرب الـجـنـوبــيــه

والـعـسـاكـر ذبحنـاهـا
....................................... فـي المشيرب ضحى الهيـه

بـالـهـنـادي ولـينـاهـا
.........................................مـاهـي بالطيـب مهديـــــــه

[ريانيكو]

أسأل شيبانك الله يسلمك بيقلون لك عن الوجبه اوعن المعارك الثانيه اللي صارت ....
اولعلمك الخاص هل قطر الأوليين كانوا فرسان قطع والتاريخ يشهد على كلامي....
والشباب ردو عليك اخوي....

[(( ريـانـي ))]

اقتباس: المشاركة الأصلية كتبت بواسطة بوصقر     طبعا الاخ اللي متشكك بالمعركة حبيت اوضحلك انها صحيحة 100%100 لانها كانت بمشاركة جميع قبايل قطر بدون ذكر اسمائها لانها معروفة ومايحتاج نعدهم. والعديد من الشعراء في ذاك الوقت كتب الاشعار والشيلات التي تؤكد انتصار ال ثاني مع اهل قطر على الاتراك ومنها على سبيل المثال هذه الشيلة المعروفة للشاعر سعد بن علي المهندي يقول فيها: تــو مــا زان مــرمــاهــا ....................................... وبـان مـن مـخـلف النـيــــــه هـقــوة الـلـي تــهـقــواهـا ....................................... جـــات بـالـعكـس مـلــويــــه دارنا الـلـي ســـكــنــاهـا ....................................... بـالــقــسـا والــفــراهـــيـــه مـهـبـل الـلـي تـمـنــاهـا ....................................... بـا أمـلـح الـسيف محميـــه بـو فـهـد شـاد مـبنـاهـا ....................................... يــوم حــرب الـجـنـوبــيــه والـعـسـاكـر ذبحنـاهـا ....................................... فـي المشيرب ضحى الهيـه بـالـهـنـادي ولـينـاهـا .........................................مـاهـي بالطيـب مهديـــــــه

يا الغالي هالشعر للمرحوم محمد بن حمزه آل الشيخ الكواري


تــو مــا زان مــرمــاهــا
....................................... وبـان مـن مـخـلف النـيــــــه

هـقــوة الـلـي تــهـقــاهـا
....................................... جـــات بـالـعكـس مـلــويــــه

دارنا الـلـي ســـكــنــاهـا
....................................... بـالــشهب الملح محميه

والـعـسـاكـر ذبحنـاهـا
....................................... فـي المشيرب ضحى الهيـه

ويا الغالي هالشعر معروف بين البكواره أنه لمحمد بن حمزه

وثاني شي هاذي تتكلم عن معركة مشيرب

وفي فرق بين معركة الوجبة ومعركة مشيرب